Psa 19 | NdeIBE | STEP | Kumqondisi wokuhlabela. Ihubo likaDavida. Amazulu afakaza inkazimulo kaNkulunkulu; lomkhathi utshumayela umsebenzi wezandla zakhe.

Psalms 19

1 Amazulu afakaza inkazimulo kaNkulunkulu; lomkhathi utshumayela umsebenzi wezandla zakhe.

2 Usuku ngosuku lezizinto ziyakhuluma; ubusuku lobusuku zibonisa ulwazi.

3 Akukho kukhuluma loba limi bani lapho ilizwi lazo lingezwakali khona.

4 Ilizwi lazo lizwakala emhlabeni wonke, amazwi azo afika emikhawulweni yomhlaba. Ilanga uselakhele ithente emazulwini,

5 lona elinjengomyeni ephuma exhibeni lakhe, njengentshantshu yomgijimi ethakazelela ukugijima ibanga layo.

6 Liphuma emkhawulweni wamazulu lihambe indlela yalo liyotshona ngakuloyana; kakukho okusithekileyo ekutshiseni kwalo.

7 Umthetho kaJehova uphelele uvuselela umphefumulo. Izimiso zikaJehova zithembekile, zihlakaniphisa abayizithutha.

8 Iziqondiso zikaJehova zilungile, ziletha ukuthokoza enhliziyweni. Imilayo kaJehova isobala, iletha ukukhanya emehlweni.

9 Ukumesaba uJehova kuhlanzekile, kumi kuze kube phakade. Izahlulelo zikaJehova ziqinisekile njalo zilungile ngokupheleleyo.

10 Ziligugu okudlula igolide, okudlula igolide elinengi elicengekileyo; zimnandi kuloluju, uluju olujuluka ohlangeni.

11 Ngazo inceku yakho iyacetshiswa; ukuzilandela kulomvuzo omkhulu.

12 Ngubani ongazizwisisa iziphambeko zakhe na? Thethelela iziphambeko ezisithekileyo.

13 Phephisa inceku yakho ezonweni zamabomo; sengathi zingeze zabusa phezu kwami. Lapho ngizakuba msulwa ngingabi lacala lokona okukhulu.

14 Sengathi amazwi omlomo wami leminakano yenhliziyo yami kungathokozisa emehlweni akho, O Jehova, Dwala lami loMkhululi wami.